ცნობაგარემოს დაცვისა და სოფლის მეურნეობის მინისტრის მოადგილემ ლაშა ავალიანმა, სურსათის ეროვნული სააგენტოს უფროსმა გიორგი იაკობაშვილმა და სააგენტოს ვეტერინარებმა ვეტერინარული კლინიკების წარმომადგენლებს პროგრამის ფარგლებში დაგეგმილი ღონისძიებები გააცნეს. შეხვედრაზე ყურადღება გამახვილდა ვეტერინარული კლინიკების აქტიური ჩართულობის მნიშვნელობაზე, მათ შორის პატრონიანი ძუ ძაღლების სტერილიზაციის პროცესში.
პროგრამის მიზანია ძაღლების მიკვლევადობის უზრუნველყოფა და ცოფის პრევენცია, რაც მნიშვნელოვანია როგორც ცხოველების, ასევე ადამიანის ჯანმრთელობისა და უსაფრთხოების დასაცავად.
პროგრამის ფარგლებში საქართველოს მასშტაბით (გარდა თვითმმართველი ქალაქებისა) იგეგმება პატრონიანი ძაღლების ცოფის საწინააღმდეგო ვაქცინაცია, ჩიპირება, რეგისტრაცია და სტერილიზაცია, ხოლო უპატრონო ძაღლების შემთხვევაში – ვაქცინაცია, იდენტიფიკაცია და კასტრაცია/სტერილიზაცია.