მოპარული ფული ბავშვების გადასარჩენად _ გამოხმაურება გურიაში ზურაბიშვილის ახალ ინიციატივაზე

საქართველოს მეხუთე პრეზიდენტი სალომე ზურაბიშვილი „ქართულ ქარტიაზე“ ხელმომწერებს ორ მნიშვნელოვან ცვლილებას სთავაზობს. ინიციატივა, რომელიც დიუშენის სინდრომით დაავადებული ბავშვების მკურნალობასა და კორუფციით მითვისებული თანხების სოციალური მიზნებისთვის გამოყენებას ეხება, გურიაში პოლიტიკური განხილვების თემად იქცა. რამდენად მისაღებია პრეზიდენტის გეგმა ადგილობრივი ოპოზიციისთვის და რას ფიქრობენ მმართველ გუნდში?

სალომე ზურაბიშვილი მიიჩნევს, რომ „ქართულ ქარტიას“ განახლება სჭირდება და ხელმომწერებს ორ პრიორიტეტს სთავაზობს:

1. დიუშენის სინდრომით დაავადებული ბავშვების მედიკამენტების ბიუჯეტიდან დაუყოვნებლივ დაფინანსება;
2. სპეციალური ფონდის შექმნა, სადაც კორუფციითა და მანკიერი ტენდერებით ბიუჯეტიდან მოპარული თანხები ჩაირიცხება. ეს რესურსი ბავშვთა სახელმწიფო ონკოლოგიური ცენტრის მშენებლობასა და მკურნალობის ხარჯებს მოხმარდება.

„ჩვენი მომავალი თაობის ჯანსაღ სიცოცხლეს უნდა მიეძღვნას ამდენი თაღლითი და კორუმპირებული პოლიტიკოსისგან მოპარული თანხები!“ _ აცხადებს საქართველოს მეხუთე პრეზიდენტი.

საკითხის შესახებ კომენტარის გაკეთება გურიაში იმ პარტიების ლიდერებს ვთხოვეთ, ვისაც ხელი ქარტიაზე მოწერილი აქვს.

ბაჩო ახალაძე, პარტია „ახალი“, ჩოხატაური: „დიუშენის კუნთოვანი დისტროფიით დაავადებული ბავშვებისთვის მედიკამენტების დაფინანსება ქარტიაში განსაკუთრებით მნიშვნელოვანია ჰუმანური თვალსაზრისით. სახელმწიფო იღებს პასუხისმგებლობას ყველაზე მოწყვლად ჯგუფებზე. კორუფციით მითვისებული თანხების დაბრუნება კი პოზიტიური გზავნილია _ საზოგადოებრივი რესურსი ისევ საზოგადოებას უნდა დაუბრუნდეს“.

გოჩა ჯანაშია, ლანჩხუთის საკრებულოს წევრი, „ლელო“:

„ეს თემა უკვე გასცდა სოციალურ საკითხს, ნაბიჯები აუცილებლად გადასადგმელია. თუ ქარტიის მხრიდან მოხდება ამ იდეის წამოწევა, მივესალმები. რაც შეეხება კორუფციას, ის ძალიან გამჯდარია ჩვენს ქვეყანაში და სისტემური მიხედვა სჭირდება _ პირველ რიგში, ის უნდა აღმოიფხვრას“.

სტატიის წერის პროცესში დავუკავშირდით „ერთიანი ნაციონალური მოძრაობის“ ლიდერს ჩოხატაურში, დიმიტრი კორიფაძეს. თუმცა, მან გვითხრა,რომ მოცემულ მომენტში საუბარი არ შეეძლო და მოგვიანებით დაგვიკავშირდება. კომენტარის მიღების შემთხვევაში მას აუცილებლად შემოგთავაზებთ.

მმართველ გუნდში მეხუთე პრეზიდენტის ინიციატივას სკეპტიკურად უყურებენ _ გია ვოლსკიმ ზურაბიშვილის ნაბიჯი მანიპულაციად შეაფასა:

„სალომე ზურაბიშვილმა რობინ ჰუდის თუ არსენას როლი მოირგო და ამ თემით მანიპულირებს“, _ განაცხადა ვოლსკიმ.

რაც შეეხება გიორგი გახარიას პარტიას, ისინი კვლავ უარს აცხადებენ ქარტიასთან შეერთებაზე. ექს-პრემიერის გუნდში ოპოზიციასა და ყოფილ პრეზიდენტს 4 ოქტომბრის მოვლენების განვითარებაში ადანაშაულებენ და ყოველგვარ თანამშრომლობაზე უარს აცხადებენ.

ინფორმაციისთვის, თბილისში, მთავრობის ადმინისტრაციის შენობასთან რამდენიმე დღეა დიუშენის კუნთოვანი დისტროფიით დაავადებული ბავშვების მშობლები აქციას მართავენ. მათი მხარდამჭერი აქციები გაიმართა სხვადასხვა ქალაქებშიც.

ისინი იმ მედიკამენტების შემოტანას ითხოვენ, რომლებიც ბავშვების სიცოცხლის ხარისხს გააუმჯობესებს.

პრემიერმა ირაკლი კობახიძემ დიუშენის კუნთოვანი დისტროფიით დაავადებული ბავშვების მშობლები ჯანდაცვის სამინისტროსთან გადაამისამართა.

ჟურნალისტების კითხვაზე შეხვდება თუ არა მშობლებს “ქართული ოცნების” პრემიერ-მინისტრმა ორი სიტყვით უპასუხა: “ჯანდაცვის სამინისტრო”.

ამასთან, კობახიძემ აღნიშნა, რომ სახელმწიფომ გონივრული გადაწყვეტილება უნდა უნდა მიიღოს ყველა თემასთან დაკავშირებით ისე, რომ “გონივრულად დაიხარჯოს თითოეული თეთრი სახელმწიფო ბიუჯეტიდან”.

ჯანდაცვის მინისტრი მიხეილ სარჯველაძე აცხადებს, რომ დიუშენის სინდრომის მქონე ბავშვებთან დაკავშირებით, კარგად ესმის პაციენტების და მშობლების ემოციების და საკითხთან დაკავშირებით “მაქსიმალურად ყველაფერი” გაკეთდება:

„საკითხი არის სერიოზული, ეს უნდა განიხილებოდეს, მათ შორის სპეციალისტების ჩართულობით, სხვა ქვეყნების გამოცდილებაზე დაყრდნობით. საჭიროა სიღრმისეული, მათ შორის მეცნიერული შეფასება და გამოკვლევა“.

სარჯველაძის თქმით, არც ერთი თანხა არ იქნება დაზოგილი იმ შემთხვევაში, თუ ეჭვქვეშ არ დგას სამკურნალო საშუალების უსაფრთხოება.

5 მაისს აკეთებული ეს განცხადება თითქმის არ განსხვადება 29 აპრილს, პარლამენტში ინტერპელაციის წესით მისი მოსმენის დროს გაკეთებული განცხადებისგან:

„საჯაროდაც შემიძლია ყველას ვუთხრა, რომ ვისაც ობიექტურად, გულწრფელად აქვს კითხვები, საკითხის რეალურად შესწავლის სურვილი და არა ემოციებით მანიპულირების, შემიძლია, შევხვდე სამინისტროში, პირადადაც მივაწოდოთ პასუხები ნებისმიერ საკითხთან დაკავშირებით“, _ ამის საქართველოს ჯანდაცვის მინისტრმა, მიხეილ სარჯველაძემ პარლამენტის პლენარულ სხდომაზე განაცხადა.

სარჯველაძის თქმით, დიუშენის კუნთოვანი დისტროფიის სამკურნალო მედიკამენტების შესწავლის პროცესი აუცილებლად გაგრძელდება.

„რა წამს იქნება საკმარისი საფუძველი და ბაზა გადაწყვეტილების მიღებისთვის, ამ გადაწყვეტილებას არავინ დააყოვნებს. ჩვენ გვსაყვედურობენ, როდესაც ამ ხელისუფლების პირობებში დაახლოებით ასჯერ გაიზარდა ონკოლოგიის ბიუჯეტი და ვინმე საუბრობს იმაზე, რომ ხელისუფლებას ადამიანების ჯანმრთელობაზე ფული ენანება? ეს არის მტკნარი ტყუილი. თითოეულ მედიკამენტზე გვჭირდება მუშაობის გაგრძელება, ინფორმაციის მოძიება ინტენსიურად. ეს უნდა გაგრძელდეს და ამას ვაკეთებთ უკანასკნელი დღეების განმავლობაშიც, კიდევ უფრო ადრეც, ვიდრე გარკვეულ სიმწვავეს შეიძენდა ეს პრობლემა, ვიდრე საზოგადოებისთვის თვალსაჩინო გახდებოდა. კომუნიკაცია გვაქვს ექსპერტებთან, სხვა სახელმწიფოების მარეგულირებლებთან. ვიკვლევთ ინტენსიურად და ამის კონკრეტული მტკიცებულებებიც არსებობს“, _ განაცხადა ჯანდაცვის მინისტრმა.

ინფორმაციისთვის, დიუშენის კუნთოვანი დისტროფია იშვიათი გენეტიკური დაავადებაა, რომელიც კუნთების პროგრესირებად სისუსტეს იწვევს. საქართველოში ამ დიაგნოზის მქონე ბავშვების მშობლები რამდენიმე თვეა ითხოვენ სახელმწიფოსგან თანამედროვე მედიკამენტების (მათ შორის „ელევიდისის“) დაფინანსებას, რომელთა ღირებულებაც მილიონობით დოლარს აღწევს. მშობლების პროტესტმა პერმანენტული ხასიათი მას შემდეგ მიიღო, რაც ჯანდაცვის სამინისტრომ გადაწყვეტილების მიღება მედიკამენტების „დამატებითი კვლევის“ საჭიროებით გადაავადა.

The post მოპარული ფული ბავშვების გადასარჩენად _ გამოხმაურება გურიაში ზურაბიშვილის ახალ ინიციატივაზე appeared first on გურია ნიუსი.