ცნობაროგორც გიორგი ბუხრაშვილიმ ბრიფინგზე განაცხადა, სამართალდამცველებმა გამოავლინეს კუსტარული ნარკოლაბორატორია და ნარკოტიკული საშუალების კულტივირებისთვის განკუთვნილი სამი სათბური. ამოღებულია უპრეცედენტო რაოდენობის — 28 კილოგრამამდე „მეთადონი“, რაც, მისი თქმით, პოლიციის მიერ ოდესმე ამოღებულ ყველაზე დიდ მოცულობას წარმოადგენს.
ოპერაციის ფარგლებში, თბილისსა და რეგიონებში სხვადასხვა მისამართზე ჩატარებული ჩხრეკების შედეგად, ამოღებულია სარეალიზაციოდ გამზადებული ნარკოტიკები, დაფასოებისთვის საჭირო მასალები, ცეცხლსასროლი და ავტომატური იარაღები, ასევე საბრძოლო მასალა. აღმოჩენილია სპეციალურად მოწყობილი სათბურები, სადაც განსაკუთრებით დიდი ოდენობით „კანაფის“ უკანონო კულტივირება ხდებოდა.
დაკავებულები არიან როგორც საქართველოს, ისე უცხო ქვეყნის მოქალაქეები. გამოძიება საქართველოს სისხლის სამართლის კოდექსის რამდენიმე მუხლით მიმდინარეობს და 20 წლამდე ან უვადო თავისუფლების აღკვეთას ითვალისწინებს.