ცნობა
საქართველოში ელექტროენერგიის ტარიფი გაძვირდა
საქართველოში ელექტროენერგიის ტარიფი იზრდება: მომხმარებლებისთვის დენის ფასი 5 თეთრით მოიმატებს, ხოლო კომერციული სექტორისთვის ზრდა საშუალოდ 4-6 თეთრის ფარგლებში განისაზღვრა. გაზრდილი ტარიფით მოხმარებული ელექტროენერგიის ათვლა 1-ლი აპრილიდან დაიწყება. ცვლილება შეეხება როგორც თბილისს, ისე ქვეყნის რეგიონებს.
ენერგეტიკისა და წყალმომარაგების მარეგულირებელი კომისიის (სემეკი) განცხადებით, ტარიფის ზრდის მთავარი მიზეზები ელექტროენერგიის იმპორტზე დამოკიდებულება და შესასყიდი ფასის მატებაა.
რამ განაპირობა ტარიფის ზრდა
სემეკის განმარტებით, ფასის ზრდაზე გავლენა იქონია არა მხოლოდ იმპორტდამოკიდებულებამ, არამედ ელექტროენერგიის შესყიდვის გაძვირებამაც. ამასთან, კომისია მიუთითებს, რომ ტარიფზე მოქმედებს ინვესტიციების მოცულობაც, რომელიც ახალ სატარიფო პერიოდში არის გათვალისწინებული.
მარეგულირებლის ინფორმაციით, აღნიშნული ინვესტიციები მიზნად ისახავს ელექტროენერგიის გამანაწილებელი სისტემის ეტაპობრივ მოწესრიგებას და ავარიული გათიშვების შემცირებას. კომისიის შეფასებით, შედეგად მომხმარებლებს გაუმჯობესებული ელექტრომომარაგება ექნებათ და შემცირდება ხშირი წყვეტები.
მრავალმილიარდიანი ინვესტიციები ქსელის გაუმჯობესებისთვის
სემეკის ცნობით, კომპანია “ენერგო პრო ჯორჯია“ 2026-2030 წლებში წელიწადში საშუალოდ 200 მილიონი ლარის ინვესტიციას განახორციელებს, რაც ჯამურად დაახლოებით 1 მილიარდ ლარს შეადგენს. დამატებით, მესამე მხარის დაფინანსებით, კომპანია კიდევ 129 მილიონ ლარს ჩადებს სამწლიან პერიოდში, რაც მომხმარებლის ტარიფზე გავლენას არ მოახდენს.
ამავე პერიოდში “თელასის“ მიერ დაგეგმილი ინვესტიციები 400 მილიონ ლარს აჭარბებს. ჯამში, მომდევნო წლებში ელექტროენერგიის ქსელის რეაბილიტაციასა და მომსახურების ხარისხის გაუმჯობესებაზე 1.5 მილიარდ ლარზე მეტი დაიხარჯება, რაც, სემეკის შეფასებით, უპრეცედენტო მოცულობის ინვესტიციაა.
კომისიის განცხადებით, ეს პროექტები ხელს შეუწყობს როგორც ტექნიკური პრობლემების შემცირებას, ისე განახლებადი ენერგიების ინტეგრაციას და ბიზნესისთვის ახალი ენერგოპროექტების განხორციელების შესაძლებლობების გაზრდას.
ტარიფის ზრდა და წინა წლების დინამიკა
სემეკი აღნიშნავს, რომ 2024-2025 წლებში ელექტროენერგიის ტარიფი 3 თეთრით იყო შემცირებული. შესაბამისად, 2023 წლის მაჩვენებელთან შედარებით, ახალი ტარიფი ფაქტობრივად მხოლოდ 2 თეთრით არის გაზრდილი.
ტარიფის შემცირება წინა წლებში უკავშირდებოდა ენგურჰესის რეაბილიტაციის შედეგად იაფი ენერგიის წილის ზრდას, ასევე მაღალ ჰიდროლოგიურ მაჩვენებლებს და თბოსადგურების მიერ წარმოებული შედარებით იაფი ელექტროენერგიით იმპორტის ნაწილობრივ ჩანაცვლებას.
მარეგულირებლის შეფასებით, ტარიფის ზრდა ამჯერად მინიმალურ და დაბალანსებულ დონეზეა განსაზღვრული, რათა არ მოხდეს კომერციული სექტორისთვის ორნიშნა ზრდა.
ახალი ტარიფები 1-ლი აპრილიდან
ახალი ტარიფები განსხვავდება როგორც მოხმარების მოცულობის, ისე ძაბვის დონეების მიხედვით.
“თელმიკოს“ მომხმარებლებისთვის, საყოფაცხოვრებო ტარიფები 20.041 თეთრიდან იწყება და მოხმარების ზრდასთან ერთად 28.537 თეთრამდე აღწევს. კომერციული სექტორისთვის ტარიფები 27.762-დან 35.261 თეთრამდე მერყეობს.
“ეპ ჯორჯია მიწოდების“ შემთხვევაში, მოსახლეობისთვის ტარიფი 19.731 თეთრიდან იწყება და 28.227 თეთრამდე იზრდება, ხოლო კომერციული მომხმარებლებისთვის — 30.322-დან 35.713 თეთრამდე.
სემეკის განცხადებით, მიუხედავად ტარიფების ზრდისა, საქართველოში ელექტროენერგიის ფასები კვლავ ერთ-ერთი ყველაზე დაბალია როგორც მეზობელ ქვეყნებთან, ისე ევროპის ბაზრებთან შედარებით.