29 აგვისტოს უმძიმესი ავარია მოხდა კავკაზის ფედერალურ გზატკეცილზე, სოფელ ინოზემცევოსთან. წინასწარი ინფორმაციით, საქართველო-მოსკოვის მარშრუტით მოძრავი Setra-ს ავტობუსი წინ მიმავალ KamAZ-ის სატვირთო მანქანას შეეჯახა. შეჯახების შემდეგ, სამგზავრო ავტობუსი გზიდან გადავიდა და თხრილში აღმოჩნდა.ყველა დაშავებული პიატიგორსკის სამედიცინო დაწესებულებებში გადაიყვანეს.
რუსული სახელმწიფო საინფორმაციო სააგენტო Tass-ის ცნობით, ავტობუსში თითქმის ყველა მგზავრი საქართველოს მოქალაქე იყო.
“გამოძიება სტავროპოლის მხარის პროკურატურის განსაკუთრებული კონტროლის ქვეშაა”, – წერს “ტასი” სამართალდამცავ უწყებაზე დაყრდნობით.
გარდაცვლილთა შორისაა 45 წლის ქართველი მამაკაცი, რომელიც მოსკოვში მეუღლესთან და შვილებთან ერთად მიდიოდა. როგორც AMBEBI.GE-ს გარდაცვლილის ახლობელი უყვება, მამაკაცი ავტობუსში, მძღოლის გვერდით იჯდა და ავარიის დროს ადგილზე დაიღუპა.
“ავტობუსში თითქმის ყველა ქართველი იყო. ერთ-ერთი ოჯახი საქართველოში დროებით იყო ჩამოსული. მოსკოვში ცხოვრობდნენ, სასკოლოდ სახლში ბრუნდებოდნენ. ქმარი დაღუპულია, მძღოლის გვერდით ვინც იჯდა, ყველა დაიღუპა. მათ შორის იყო, ისიც. მისი მეუღლე და სამი შვილი სტავროპოლის კლინიკაში არიან, დამტვრეულები, რეანიმაციულ განყოფილებაში. როგორც გავიგეთ, პატარას ფეხის ამპუტაცია დასჭირდა. რუსული მხარისგან გავიგეთ გარდაცვალების ამბავი. იმედია, საქართველოს საგარეო საქმეთა სამინისტრო გადმოსვენებაში დაგვეხმარება” – გვიყვებიან ახლობლები.
რას აცხადებენ საქართველოს საგარეო უწყებაში?
“რუსეთის ფედერაციაში შვეიცარიის კონფედერაციის საელჩოს საქართველოს ინტერესების სექცია ახორციელებს ყველა საჭირო ღონისძიებას თბილისი–მოსკოვის მიმართულებით მოძრავ სამგზავრო ავტობუსში მყოფი საქართველოს მოქალაქეების შესახებ ინფორმაციის მოპოვების მიზნით”. – აცხადებენ სამინისტროში, მათ კომენტარს ტვ პირველი ავრცელებს.
შეჯახების ყველა გარემოებას და ტრაგედიის გამომწვევ მიზეზებს შესაბამისი უწყებები სწავლობენ.